Dunsanak-dunsanak awak nan manjadi korban banjir di Pasisia dan di Pasaman Barat kini iduiknyo sabana susah di ateh susah. Bak kecek pepatah urang tuo-tuo saisuak juo, lah jatuah diimpok dek baban barek pulo.
Dari barita koran ‘Singgalang’ dikatahui dek urang-urang di lapau Uwo Pulin baraso korban banjir di pasisia kini kakurangan bareh. Ijankan di rumah-rumah atau di kadai, di gudang pun indak ado lai bareh.
Di Pasaman Barat, kini korban-korban banjir lah mulai pulo kanai sakik paruik. Dalam istilah kasehatannyo, kanai diare.
“Iko iyo lah sabana jatuah diimpok janjang nampaknyo mah,” kato Udin Kuriak.
“Kini indak banyak rumah nan pakai janjang lai doh Din. Kurang pas istilah tu untuak zaman kini mah,” sorak Mak Pono.
“Apo nan pas manuruik Mamak?” Tanyo Udin.
“Lah jatuah diimpok dek baban barek. Baban barek ko pakai singguluang batu pulo. Cubo bayangkan barek dan sakiknyo dek Udin. sumah abih, haratao tandeh, nan ka dimakan indak ado pulo,” jawek Mak Pono.
“Tunggu Mak. Den bayangan nta lu!” Potong Kari Garejoh.
“Iko indak untuak garah doh. Harusnyo awak marasoan baa parasaan dunsanak awak di kampuang Uncu Labai kini. Rumah, sawah sarato tampek usao lah anyuik dek banjir. Dalam kondisi bantuak itu indak pulo ado bareh untuak ditanak. Kiro-kiro apo nan ka dimakan dek masyarakaik? Bayangkanlah baa anak-anak indak lalok di rumah dan indak pulo ado nasi. Jujur se, den iyo ndak talok mambayangkannyo doh,” kecek Udin.
“Batua mah Din. Kapatang Uncu sempat ma-es-em-es den. Keceknyo kalau ado kawan-kawan nan nio mambantu, rancak makanan dikirim ka situ. Salain itu salimuik jo ubek-ubek,” kecek Uwo Pulin pulo indak katinggalan basuaro.
“Saandainyo ado bareh, dima ka batanak? Rumah tu bana nan indak ado. Lah anyuik. Kok ado bana tenda, baa maiduik-an api? Nagari tu taganang dan hujan indak baranti turun. Kabanyo kayu api ndak lo ado,” Angah Piyan lah sato pulo mangecek.
“Baitu juo dunsanak awak di Pasaman Barat, Ngah. Rumah tarandam, sakik paruik tibo pulo. Ijankan untuak baubek, untuak nan ka dimakan se indak ado,” kato Udin baliak.
“Samo badoa se awak, mudah-mudahan nagari tu capek bangkik dan indak ado lai musibah. Ciek lai awak harus tabah dan saba. Karano Allah indak ka manimpokan musibah ka suatu kaum, kalau kaum itu indak sanggup manarimonyo. Satiok musibah pasti ado hikmahnyo,” kecek Malin Kacindin. (eSPe St.Soeleman)
Tidak ada komentar:
Posting Komentar